طراطير طراطير طراطير
*****************
طراطير طراطير طراطير
احنا بقينا في زمن الفرافير
عيال مش عاوزه تتعب
عاوزه بس تطير
طب يابني روح اشتغل
يقولك ابويا عنده كتير
قاعد وراكن ع الرف
مستني الطوابير
طراطير طراطير طراطير
والتاني سرحان في التوهان
قاعد خنزير
نايم او صاحي بيحلم
فاكر نفسه دكتور ولا مدير
ماحدش ها يشتغل
الحكومه عاوزه شوية تطهير
اللي فيها مكفيها
اصغر ما فيها كبير
طراطير طراطير طراطير
واحد قرب يطلع ع المعاش
ويقعد جنب العصافير
وزميله التاني مات
و ارتاح من المشاوير
واللي عايش وبعافية شويه
جاتله البواسير
طراطير طراطير طراطير
اما عمك دعبس من طبطه
بيقولوا عليه سكير
راجل في حاله
بيروح المولد ويبيع زمامير
الناس مش سايبه حد في حاله
ولا صغير ولاكبير
اه فين ايام زمان
ايام الحمص والحلاوة والفطير
كانت ايام حلوه مافيهاش هم
ولا غم ولا كلام زي السم
كلام ناعم خفيف ع القلب زي الحرير
طراطير طراطير طراطير
ياريت تتعلملك صنعه
وتبص لابوك وتغير
شوفت الواد ولعة
بقي ولعة واسطي كبير
بعد ماكان بينضرب كل علقه وعلقة
بالشواكيش والمسامير
بقى راجل وزين الرجاله
مش زيكم ياشوية صراصير
عنده محلات ومحلات
ماشاء الله عليه ف قرية ابو صوير
طراطير طراطير طراطير
لسه برضه بدور علي وظيفة
الله يرحم العاطشجي.والكلاف والغفير
كانوا مبسوطين راضيين بيعيشتهم
بحق الله العلي القدير
ولما تسال حد فيهم يقولك
انا غني مش فقير
وهو ف بيته معندوش ولا حاجة
بس عنده قناعه وعنده الخير
طراطير طراطير طراطير
شوفلك بقي بلاص عسل
ولا قله تكسرها وري زيير
وتنسي كل اللي حصل
وتفكر في التغير
بلا وظيفة بلا كسل
ولا ها ترجع تغني وتقول طراطير
طراطير طراطير طراطير
احنا بقينا في زمن الفرافير
*********************

بسيوني صديق